Бројките говорат дека Лео Меси е најдобриот фудбалер на сите времиња. Се разбира дека има и такви кои сметаат дека Кристијано Роналдо, Марадона, Пеле ја заслужуваа таа титула, но јасно е дека еден е Лео.
Деновиве Лео го даде едно од неговите најискрени интервјуа, за аргентинската „Лузу ТВ“. Мега – ѕвездата во него кажува за својот живот што досега го нема кажано. Тој отворено зборува за својата опсесија со редот, тешкотиите во кариерата, односот со сопругата Антонела и децата, како и за своите идни планови, кои не вклучуваат тренерска кариера.
„Знам дека сум малку почуден од повеќето луѓе во некои аспекти… Навистина ми се допаѓа да бидам сам“, вели тој. Хаосот дома со неговите три деца понекогаш го оптоварува и тој бара моменти на осаменост во кои едноставно гледа телевизија или натпревар.
Една од неговите најголеми опсесии е редот:
„Антонела секогаш ме прекорува за редот, но јас отсекогаш сум бил опседнат со редот. На почетокот ја менував… Таа беше целосен хаос, а јас бев многу, многу уреден. Сега сме на исто ниво“, вели Меси.
„Јас сум еден од оние луѓе кои ја подготвуваат облеката за тренинг претходниот ден, сè е на свое место. Исто така, не сакам луѓето да ги допираат моите работи.“
Иако му е тешко да ги изрази своите емоции, Меси се опишува себеси како романтичар.
„Многу сум ориентиран кон детали. Ги сакам малите детали“, вели тој, додавајќи дека им остава мали подароци како чоколадо или цвеќе на своите деца кога излегуваат.
Патот до славата не беше лесен. Меси се сеќава на скапиот третман на кој бил подложен кога имал 11 години.
„Мајка ми мораше да оди до Росарио за да ги добие парите што ни ги вети „Њуелс“, а многу пати ѝ даваа само 5 или 10 песоси“, вели тој за тешкотиите што на крајот доведоа до неговото заминување.
Пред Барселона, на хоризонтот се појави уште еден аргентински великан:
„Бев на проба во Ривер Плата… Ми рекоа дека ме сакаат, дека ќе платат за мојот третман. Единственото нешто што ни го кажаа беше дека не можат ништо да направат во врска со мојата исписница. Морав да одам во „Њуелс“ и да ја земам. Кога отидовме да ја побараме, не ни ја дадоа. Беше многу тешко. Сè со Ривер заврши таму, а потоа се појави Барселона, нешто што никој од нас не го планираше.“
Меси, исто така, отворено зборуваше за неговиот комплициран однос со репрезентацијата на Аргентина.
„Во Барселона, работите беа спектакуларни за мене… Отидов во Аргентина и беше сосема спротивното. Бев како странец, ме навредуваа, резултатите не доаѓаа.“
Тој признава дека жали за својата одлука накратко да се повлече од тимот, но поддршката од помладата генерација играчи го врати.
Клучна фигура во новиот дух во тимот е Родриго де Пол.
„Де Пол беше оној што ја сруши бариерата. Тој ги направи работите поприродни во групата, ни помогна на сите да добиеме самодоверба и да се опуштиме“, објаснува Меси. Поразот од Саудиска Арабија на Светското првенство во Катар се покажа како катализатор што го здружи тимот и ги доведе до триумф.
Денес, Меси ужива во порелаксиран живот во Мајами, каде што неговата дневна рутина е подредена на неговите деца и тренинзите. Тој открива и некои куриозни детали од неговиот секојдневен живот:
Технологија: Тој гледа многу TikTok, но не користи ChatGPT, за разлика од неговата сопруга Антонела.
Јазици: Може да зборува англиски, но се двоуми да го прави тоа пред камера. Со смеа се сеќава како бил принуден да сними реклама на кинески јазик.
Пијалоци: Сака вино, понекогаш измешано со Спрајт
Кога станува збор за иднината по неговата играчка кариера, Меси има јасна визија.
„Не се гледам себеси како тренер. Идејата да бидам спортски директор ме интересира повеќе, но ако треба да бирам, најмногу би сакал да бидам сопственик на клуб“, вели тој.
„Би сакал да имам свој клуб, да го развивам, да почнувам од нула“.
На крајот од разговорот, Меси прави преглед:
„Фала му на Бога, што повеќе би можел да побарам? Успеав да направам сè. Бог ми даде многу повеќе отколку што некогаш сум замислувал… Што и да доаѓа сега во мојата кариера е бонус, подарок. Повеќе сум од благодарен за сè што можев да доживеам и постигнам“.
