Чаби Алонсо одмара откако Реал го отпушти во јануари по 34 натпревари, во кои забележа 24 победи, 4 реми и 6 порази. Мандатот на клупата на „Кралскиот клуб“ беше обележан со тензии со најголемите ѕвезди на клубот, како Винисиус Жуниор.
Можност за враќање во тренерската кариера може да се појави наскоро, но шпанскиот стратег не планира да ја прифати првата понуда. Сепак, особено интересен е повикот од Ливерпул, каде што со нетрпение го очекуваат, пишува As под наслов: „Алонсо го доби првиот повик од Ливерпул.“
Ова не е првпат Ливерпул да покажува интерес. Алонсо веќе во пролетта 2024 година одби да ја преземе клупата на Баерн и Ливерпул, сметајќи дека за него е подобро да продолжи работа во Баер Леверкузен.
Сега трпеливо чека пред да донесе одлука, но веќе знае дека на „Енфилд“ ќе биде добредојден. Во англискиот клуб сметаат на него како решение за блиската иднина, можеби веќе во сезоната 2026/27, што ја израдува шпанскиот тренер, тврди As.
Иако Алонсо и неговиот агент не брзаат, активно ја следат ситуацијата на пазарот. Ситуацијата во Ливерпул е напната – сегашниот тренер Арне Слот е под голем притисок и секој натпревар му е клучен.
Од клубот му пренеле дека ќе ја заврши сезоната, но тоа е ризичен потег со оглед на променливите резултати на тимот кој минатото лето потроши 482 милиони евра. Овој викенд запишаа нов пораз, овојпат од Борнмут.
Управата на Ливерпул решила да дејствува однапред за да ја испита ситуацијата. Челниците знаат дека Алонсо е решен да се врати на „Енфилд“, каде што како играч помина пет сезони. Почитта кон него како играч се преплетува со восхитот кон неговите тренерски успеси, наведува As.
Алонсо уште во авионот на патот од Џеда по финалето на шпанскиот Суперкуп, бил свесен дека неговото време во Реал завршува. Направил сè што можел за да победи Барселона во Суперкупот, убеден дека може да ја преокрене ситуацијата, но не успеал.
Предахот што го зема последните две недели му овозможил да ги согледа работите од нова перспектива, а идејата за враќање на брегот на реката Мерси, како пред скоро две децении, сè повеќе му се чини привлечна, заклучува As.
