Милиони гледачи го следеа завршниот викенд од ЕХФ ЕУРО 2026, претворајќи ги натпреварите за медали во едни од најгледаните ракометни мечеви на сите времиња.
Натпреварите за медали на машкото ЕХФ ЕУРО 2026 понудија вистински спектакл на теренот – а возбудата натера милиони гледачи низ Европа да ги следат овие битки. Данска стигна до златото со убедлива победа над Германија (34:27) во големото финале во Хернинг, додека Хрватска го освои бронзениот медал по триумфот над Исланд (34:33).
Германската телевизија ZDF објави гледаност од 12,82 милиони и удел на пазарот од 50,8 проценти за финалето. На европско ниво, ова се најдобрите ракометни ТВ-рејтинзи во Германија од ЕХФ ЕУРО 2016, кога 12,98 милиони гледачи ја следеа победата на Германија против Шпанија на шампионатот во Полска.
Во Данска, ТВ2 соопшти дека повеќе од 2 милиони Данци го гледале крајот на финалето, кое имало просечна гледаност од 1,77 милиони – односно удел од околу 85 проценти. Веќе полуфиналето во петокот меѓу Данска и Исланд имало врвна гледаност од над 2 милиони.
За натпреварот за бронзениот медал, 1,2 милиони гледачи во Хрватска се вклучиле на програмата на RTL, додека Хрватска стигна до подиумот на ЕХФ ЕУРО 2026. Мечот против Исланд оствари удел од 60 проценти кај клучната целна група од 18 до 59 години.
Во меѓувреме, во Исланд беа урнати рекорди. Според телевизијата RÚV, полуфиналето Данска – Исланд имало просечна гледаност од 66,4 проценти на национално ниво – најмногу досега за било кој спортски пренос во земјата. Претходниот рекорд го држеше фудбалскиот меч Исланд – Аргентина (62,4 проценти) од Светското првенство 2018.
Овој натпревар сега падна на четвртото место, бидејќи и дуелот за бронза Хрватска – Исланд (63,1 проценти) и мечот Исланд – Словенија (62,5 проценти) остварија повисока гледаност на ЕХФ ЕУРО 2026.
Директните преноси од машкото ЕХФ ЕУРО 2026 се гледаа во повеќе од 70 земји, меѓу кои и во Македонија, на МРТ.
„Овие бројки се апсолутно спектакуларни и го потврдуваат растечкиот интерес за нашиот спорт. Настапите на националните репрезентации, како ЕХФ ЕУРО, имаат огромно емоционално влијание. Тие создаваат национално единство и препознатливост – шампионат што го следат милиони е совршена основа за понатамошен раст и развој на ракометот во Европа.“, рекоа од ЕХФ.
