Олимписките игри Милано–Кортина 2026 ќе бидат првите во историјата што официјално ќе се организираат во два града, а Македонија за првапат во историјата ќе има четворица учесници:
Јана Атанасовска, нашата најмлада натпреварувачка и рекордерка во алпско скијање, ќе се натпреварува во слалом и велеслалом.
Виктор Петков ќе настапи во алпските дисциплини велеслалом и слалом.
Ставре Јада, како најискусен член на својата трета Олимпијада, ќе се бори во нордиските трки спринт и 10 км интервал старт.
Ана Цветановска, по својот настап во Пекинг, ќе ја претставува Македонија исто така во нордиските дисциплини спринт и 10 км интервал старт.
Милано главно ќе биде домаќин на натпреварите во дворански, односно ледени спортови, додека останатите натпреварувања ќе се одржуваат во спортските кластери околу Кортина, како и во долините Валтелина и Фиеме.
Ова ќе бидат трети Зимски олимписки игри и вкупно четврти Олимписки игри одржани во Италија, а Кортина д’Ампецо веќе беше домаќин на Зимските олимписки игри во 1956 година.
На Игрите 2026 година, за првпат во олимписката програма ќе се најде ски-алпинизам, а ова ќе бидат и првите Олимписки игри одржани за време на мандатот на претседателката на Меѓународниот олимписки комитет, Кирсти Ковентри.
Свеченото отворање на Зимските олимписки игри ќе се одржи на стадионот „Сан Сиро“ во Милано, под наслов „Хармонија“. Знаменосци од Македонија ќе бидат Јана Атанасовска во Кортина и Ставре Јада во Предацо.
За време на церемонијата се планирани и специјални музички настапи на американската пејачка Мараја Кери, како и на италијанските уметници Лаура Паузини и Андреа Бочели.
Зимските олимписки игри 2026 ќе опфатат вкупно 116 натпревари во 16 спортски дисциплини, што претставува зголемување од седум натпревари и една дисциплина во однос на Игрите во Пекинг 2022.
Меѓу новите дисциплини ќе бидат машки и женски двојни могули во слободно скијање, враќањето на машките и женските двојки во санкање, кои ќе го заменат досегашното отворено натпреварување, потоа машки и женски екипни алпски комбинирани настапи, поединечно натпреварување за жени на големата скокалница во ски-скокови, како и мешана штафета во скелетон.
Игрите во Милано и Кортина ќе имаат најголем процент на учество на жени во историјата на Зимските олимписки игри – 47 проценти. Нордиската комбинација ќе остане единствениот спорт во кој се натпреваруваат само мажи.
Натпреварувањето во паралелен алпски мешан тим ќе биде укинато. Алпската комбинација преминува од индивидуален формат во натпреварување на двочлени тимови, поради намален интерес, а дисциплината е отстранета од календарот на Светскиот куп во алпско скијање уште во 2020 година.
На 138. седница на Меѓународниот олимписки комитет, одржана на 20 јули 2021 година, беше усвоен предлогот на организацискиот одбор ски-алпинизмот да се вклучи во олимписката програма како нова, опционална дисциплина. Натпреварувањето ќе опфати три настани – спринт за мажи, спринт за жени и мешана штафета.
Покрај тоа, Меѓународната хокејска федерација на 2 февруари 2024 година соопшти дека е постигнат договор со Националната хокејска лига за пауза во регуларната сезона, со што на играчите од НХЛ ќе им биде овозможено учество на Олимписките игри, за првпат од 2014 година.
Учество на Зимските олимписки игри 2026 обезбедија 92 национални олимписки комитети, како и спортисти кои ќе настапат под знамето на независни олимписки спортисти.
Олимписките комитети на Русија и Белорусија и понатаму се суспендирани поради кршење на Олимпиското примирје, како последица на руската инвазија врз Украина во 2022 година. Како и на Летните олимписки игри во Париз 2024, поединечни спортисти од Русија и Белорусија ќе можат да настапат како „индивидуални неутрални спортисти“.
На руските и белоруските спортисти не им е дозволено учество во екипни спортови, како хокеј на мраз и карлинг, бидејќи Меѓународниот олимписки комитет оцени дека „група индивидуални неутрални спортисти не може да се смета за екипа“.
Се очекува Бенин, Гвинеја Бисао и Обединетите Арапски Емирати за првпат да настапат на Зимските олимписки игри.
