Конечно, по безброј што се вели обиди сезонава, тимот на Работнички може да се пофали со полн плен од едно гостување. „Романтичарите“ предмалку во Струмица со конечни 3:4 ја совладаа Брера и колку толку си ја поправија ситуацијата на табелата која што и натаму е многу лоша секако.
Гостите поведоа во петтата минута со голот на Џејсон Езеб по асистенцијата на Сухељ Мухарем, а израмни Миле Тодоров во 18.минута. Сепак, Езеб повторно го доведе Работнички во водство во 33.минута, што беше и резултат по првиот дел. На почетокот на вториот дел, уште два нови гола за Работнички со кои практично и го реши натпреварот.
Сухељ Мухарем во 51.минута одлично се снајде во петерецот на АП Брера и зголеми на 1-3, а веќе во следната акција погоди и Манојлов, откако излезе сам пред голманот Вргов и реализираше без проблем.
Миле Тодоров во 72.минута постигна втор гол за АП Брера, а до крајот струмичани иако напаѓаа, сепак, Фабрис Ондоа беше одличен на голот на Работнички.
Во судиското продолжение, Велков го постави конечниот резултат, 3-4.
