Апсолутно заслужено. ГФК Охрид испиша историја, второлигашот е во полуфиналето во Купот на Македонија откако на пенали успеа да го елиминира гигантот во мак – фудбалот и последниот освојувач на трофејот, тимот на Вардар.
Во Купот ќе имаме нов освојувач, а за тоа се заслужни охриѓани кои не се исплашија од големиот фаворит. Одиграа храбро, машки и во регуларните 90.минути беше 1:1. Во пенал – серијата блескаше голманот Дамјан Серафимов кој одбрани два пенали.
Па така сега Охрид во полуфиналето се среќава со подобриот од утрешното четвртфинале меѓу Детонит и Силекс.
По мечот како што и доликува, фудбалерите на Охрид направија едно победничко селфи по повод овој историски пласман во полуфиналето во Купот на Македонија.
