Поранешниот холандски репрезентативец Дарил Јанмат отворено проговори за проблемите со дрогата, што го навело да стане зависен од кокаин по завршувањето на неговата играчка кариера. Тој вели дека проблемот му го уништил бракот.
Јанмат играше за Њукасл и Вотфорд во текот на долгогодишната кариера, но врвот на кариерата беше на Светското првенство во 2014 година, каде што Холандија стигна до полуфиналето, но загуби на пенали од Аргентина.
Тој ја заврши кариерата во АДО Ден Хаг, истиот клуб во кој ја започна својата кариера, во 2022 година. Една година подоцна, беше објавено дека бил пронајден под дејство на дрога во сомнителна населба во Холандија, а потоа беше објавено дека отишол на лекување во Јужна Африка.
Во интервју за холандскиот весник АД, Јанмат вели дека имал тешкотии во секојдневниот живот откако заврши со фудбалот.
„Не сакам да навлегувам во детали, имам деца кои слушаат и читаат многу работи. Мојата зависност од кокаин создаде беда и насилство. Беше тешко, почнав да ги лажам луѓето што ги сакам и повредив многу луѓе“, вели Јанмат.
Денеска тој вели дека е „чист“ и работи во сопствена сала за кревање товар.
