Поранешниот играч на Челзи, Џон Оби Микел, го нападна Арсенал, тврдејќи дека лидерот во Премиер лигата „се обидува со измама“ да дојдат до својата прва титула во лигата по повеќе од две децении. Нигериецот, кој освои две титули во лигата со Челзи, потенцира дека „топџиите“ тоа го прават на прекини „нелегално“ и „грдо“ за гледање, и покрај тоа што тимот на Микел Артета моментално е на врвот на табелата, пишува Goal.com.
Микел не ги штедеше зборовите во својот говор за talkSPORT, доведувајќи го во прашање тактичкиот пристап на клубот со оглед на огромните суми потрошени за засилувања.
„Кога гледам како игра Арсенал сега, тие зависат исклучиво од корнери. Потроши речиси милијарда, Микел Артета… и ми кажуваш дека единствениот начин да победиш е од корнери? Тоа е смешно“, изјави тој.
Микел верува дека креативниот талент во тимот е задушен бидејќи Артета се фокусира на мали тактички предности за да обезбеди победи. Арсенал постигна рекордни 21 гол од прекини оваа сезона, додека само 35 од нивните 100 гола во сите натпреварувања се постигнати од отворена игра.
„Единствената причина зошто навивачите на Арсенал не протестираат е затоа што се на врвот на табелата“, тврди Микел. „Креативноста што ја имаат, целиот тој потенцијал, сè исчезна. Тоа повеќе не го гледаме.“
Микел беше особено критичен кон начинот на кој Арсенал се справуваше со противниците за време на корнерите, опишувајќи ги како „очајни“ да го завршат 22-годишното чекање за титулата.
„Она што го прават за мене, е нелегално. Прво се мешаа во голманот, а сега почнаа да ги задржуваат играчите“, продолжи Микел. „Кога држите играч и го спречувате да скокне… Го гледав натпреварот против Челзи.
За мене е нелегално. Затоа мислам дека Арсенал се обидува да измами за да ја освои титулата во Премиер лигата. Очајно сакаат да ја освојат шампионската титула бидејќи не ја освоиле 22 или 23 години. А сега се толку очајни што сакаат да се протнат на тој начин.“
Микел одлучи да не ја признае потенцијалната титула на Арсенал.
„Не би ги признал како шампиони. Затоа што, според мене, начинот на кој победуваат на натпреварите е нелегален. Сосема нелегален. Освен ако Премиер лигата не го искорени тоа веднаш, почнувајќи од овој викенд. Не сакаме да го видиме тоа во фудбалот“, додаде тој.
