Попладнево на свој терен под Шара, Шкендија со многу мака дојде до неопходните три бода против Арсими и тоа благодарение на прекрасниот гол на ветеранот Бесарт Ибраими. А така Шкендија и натаму е на -3 бода во однос на лидерот Вардар. Со оваа победа шампионот ја продолжува битката за титулата.
По мечот стратегот на тетовци, Јетон Беќири изјави:
„Задоволен сум од трите бода и секако најважно се бодовите, но не сум задоволен од играта и интензитетот на тимот. Се чини дека постои еден вид летаргија кај играчите, можеби тоа е затоа што претходниот натпревар го игравме речиси целосно со 10 играчи. Дури и денес не сум задоволен од интензитетот и перформансите на тимот, но важно е што противникот не се закани во ниту еден момент. Треба да го архивираме како победа и целиот наш фокус да го вратиме на натпреварот во среда во Купот на Македонија.“
Тој ги коментираше и тензиите со некои навивачи:
„Мислам дека нашата сила била, е и верувам дека ќе продолжи да биде се нашите фанови. Зборувам и за фановите воопшто, не само за „Балистите“ кои беа прекрасни денес. Но, исто така, ги молам и останатите навивачи што доаѓаат да ја бодрат Шкендија да ги поддржи играчите, особено кога настапот не е каков што треба да биде. Би претпочитал целиот притисок, сите навреди и критики да бидат упатени кон мене, бидејќи играчите се тие што играат на теренот, а јас сум надвор од теренот. Во одредени моменти, играчите можат да прават грешки со своите реакции, исто како што ние правиме грешки, како што навивачите прават грешки и како што сите прават грешки“ рече покрај другото стратегот на Шкендија.
