Легендарниот НБА тренер и член на Куќата на славните Рик Аделман почина на 79-годишна возраст. Веста ја објави Националната асоцијација на кошаркарски тренери (NBCA), додека причината за смртта сè уште не е објавена.
Аделман остави неизбришлива трага во најсилната кошаркарска лига во светот. Во текот на дури 23 сезони како главен тренер, тој ги водеше екипите на Портланд, Голден Стејт, Сакраменто, Хјустон и Минесота, остварувајќи импресивни 1.042 победи, според кои е меѓу најуспешните тренери во историјата на НБА.
Тој зазема посебно место во историјата на Сакраменто Кингс, каде што создаде еден од најатрактивните тимови во своето време од 1998 до 2006 година. Под негово водство, Кингс играа во плејофот осум години по ред, а Аделман е сè уште рекордер во франшизата по бројот на победи на клупата.
Тој го предводеше Портланд до финалето на НБА двапати, во 1990 и 1992 година, а беше примен во Кошаркарската сала на славните „Најсмит Меморијал“ во 2021 година. Две години подоцна, ја доби престижната награда за животно дело „Чак Дејли“.
