Кошаркарите на Дубаи поведоа со 1:0 на почетокот од финалната плејоф серија од АБА лигата. Тимот на тренерот Александар Секулиќ заслужено го победи составот на Партизан со резултат од 99:93 пред околу 9.500 гледачи во неговата „Кока Кола Арена“, по подобра игра во поголемиот дел од натпреварот.
Партизан ќе има следна можност за „брејк“ во сабота од 18:00 часот, за кога е закажан вториот натпревар, исто така во Дубаи. За да се случи тој „брејк“, Партизан ќе мора да одигра многу подобро од вечерва, пред сè многу посилен и поорганизиран во одбраната, а особено во скоковите, иако статистичките бројки не го илустрираат тоа на најдобар начин.
Муса со 22 поени беше најефикасен кај домашниот состав, но и воопшто на мечот. Кај поразениот тим се истакна Браун со 20 поени.
Пред почетокот на натпреварот, беше одржано едноминутно молчење за спортскиот новинар Един Авдиќ, кој вчера ненадејно почина на 48-годишна возраст. Таа вест ги потресе сите љубители на кошарката во регионот, па затоа денешниот натпревар се играше во сенка на таа трагедија.
