Според хрватскиот весник „Спортски новости“, во Хрватскиот фудбалски сојуз веќе е донесена одлука Златко Далиќ да ја напушти селекторската позиција, додека негов наследник треба да биде Славен Билиќ. Ако тоа се случи, тоа значи дека Билиќ ќе се врати на клупата на националниот тим по повеќе од една деценија.
Според истиот извор, дури и пред почетокот на Светското првенство, челниците на ХНС одржале серија неформални разговори со репрезентативците за да проверат каков ќе биде нивниот став во врска со евентуалното враќање на Билиќ. Реакциите на играчите биле позитивни.
Во исто време, Далиќ наводно веќе има профитабилна понуда од Обединетите Арапски Емирати вредна околу пет милиони евра по сезона, која ја прифатил уште пред почетокот на Светското првенство. Во ХНС, според хрватските медиуми, сакале тренерот сам да ја објави својата одлука за заминување, а се очекува тоа да го стори најдоцна до среда.
