Нејмар стана првиот фудбалер во бразилското првенство врз кого беше применето новото правило со кое се обидуваат да спречат одолговлекување на натпреварите поради укажување лекарска помош на голманите. Капитенот на Сантос мораше во неделната победа од 3:0 против Васко да Гама да го напушти теренот на една минута, иако не беше повреден, исклучен или заменет.
Необичната ситуација се случи во средината на првото полувреме на „Сао Жануарио“. Голманот на Сантос, Габриел Бразао, по еден дуел побара лекарска помош на теренот. Според новиот пакет правила што Бразилската фудбалска конфедерација (CBF) ги воведе со цел да го намали одолговлекувањето, во таква ситуација еден фудбалер од неговиот тим мора да помине една минута надвор од теренот.
Зошто мораше да излезе токму Нејмар?
Новото правило предвидува тренерот или капитенот да одреди фудбалер кој ќе го напушти теренот на една минута, додека голманот по укажаната лекарска помош може нормално да се врати на голот. „Ројтерс“ наведува дека, доколку играчот не биде одреден во пропишаниот рок, теренот мора да го напушти капитенот на тимот.
Нејмар ја носеше капитенската лента на Сантос, па токму тој заврши покрај аут-линијата.
По истекот на една минута, судијата Лукас Касагранде му дозволи да се врати во игра. Бразилскиот „Глобо“ наведува дека целта на правилото е да се елиминира можноста тимот да има корист доколку голманот побара лекарска помош само за да ја прекине играта, да им овозможи одмор на соиграчите или тренерот да добие дополнително време за инструкции.
Иронично, Нејмар во текот на истиот натпревар мораше да помине уште една минута надвор од теренот. Подоцна и самиот доби лекарска помош, а новите правила предвидуваат дека фудбалерот на кој му се укажува помош на теренот, по продолжувањето на играта, мора да почека најмалку една минута пред да се врати во игра.
Ова беше првиот викенд во кој новите мерки се применуваа во бразилската Серија А. CBF ги воведе по договор со клубовите, а едно од најинтересните правила е токму она поврзано со лекарската помош на голманите. Сличен модел ќе се тестира и во други натпреварувања, меѓу кои и англискиот фудбал.
Покрај ова, воведени се и неколку други мерки. Заменетиот фудбалер има ограничено време за напуштање на теренот, при одолговлекување на изведувањето гол-аут судијата започнува одбројување, а играчите кои по судиската одлука го опкружуваат арбитрот мора да се оддалечат за да може до него да пристапи само капитенот.
CBF уште по првиот викенд објави дека просечното време во кое топката била во игра е зголемено. Во првите девет натпревари од 23. коло просекот изнесувал 55 минути и 29 секунди, што е околу пет проценти повеќе во споредба со претходниот период.
Бизарната казна не му ја расипа вечерта на Нејмар. Сантос го совлада Васко со 3:0 и излезе од зоната за испаѓање. Сите три гола беа постигнати во второто полувреме, а стрелци беа Габигол, Вилијан Арао и Луан Перес. Нејмар учествуваше во акциите при последните два гола.
O NEYMAR TEVE QUE FICAR 1 MINUTO FORA! ❌ Gabriel Brazão precisou de atendimento médico e, pela nova regra, um jogador do Santos teria que ficar 1 minuto fora após o atendimento ao goleiro. O escolhido foi Neymar. #FBR #Brasileirão pic.twitter.com/zHLAlssiOc
— TNT Sports BR (@TNTSportsBR) August 16, 2026
