Белградска Црвена звезда се соочува со нов проблем по елиминацијата од Викторија Плзењ во квалификациите за Лигата на Европа. УЕФА покрена дисциплинска постапка против српскиот шампион поради однесувањето на неговите навивачи на реваншот во Чешка. На трибините беше истакнат транспарент со порака во чест на Ратко Младиќ, а се слушало и скандирање на неговото име.
Европската фудбалска унија случајот го разгледува како можно „расистичко и/или дискриминаторско однесување“, како и истакнување порака несоодветна за спортски настан. Клубот дополнително се товари и за недолично однесување на тимот поради дисциплинските прекршоци на натпреварот, на кој фудбалерите на Ц. Звезда добија седум жолти и еден црвен картон.
Случајот може да резултира со сериозна санкција, особено поради квалификацијата за дискриминаторско однесување. Ц. Звезда веќе има претходно искуство со казна од УЕФА поради сличен случај со Младиќ во 2017 година.
