Холандскиот фудбалски сојуз го повлече своето писмо за доверба на претседателот на ФИФА, Џани Инфантино, и побара големи промени во раководењето со светската фудбалска организација. Холанѓаните предлагаат во Амстердам да се одржи меѓународен самит на кој би се разговарало за иднината на ФИФА.
Од федерацијата сметаат дека организацијата има потреба не само од нов претседател, туку и од целосна промена на начинот на кој се управува. Холандскиот сојуз посочува дека премногу моќ е концентрирана во рацете на претседателот и дека е потребно подобро раздвојување на претседателската и административната функција.
Тие бараат ново раководство на ФИФА од 2027 година, а меѓу главните барања се и поголема транспарентност, посилни механизми за контрола и поголема заштита на човековите права и одржливоста. Холанѓаните предлагаат до 90 отсто од средствата што ФИФА ги распределува да се инвестираат назад во развојот на фудбалот.
