Македонската машка одбојкарска репрезентација влегува во финалната фаза од подготовките за своето четврто учество на Европското првенство – ЕвроВолеј 2026. Во пресрет на континенталниот шампионат, избраниците ќе имаат и неколку контролни пресметки со бугарскиот суперлигаш Берое 2016 од Стара Загора. Гостите вечерва пристигнуваат во Скопје, а од утре се планирани неколку спаринг дуели.
„Според планот Берое ќе биде тука три дена. Ќе договориме заеднички тренинзи, спаринзи, а сигурно ќе имаме и еден или два контролни дуели. Останува да се договориме. За нас во оваа фаза од подготовките пред Европското првенство овие контроли се добредојдени“, вели селекторот Јошко Миленкоски.
Репрезентацијата продолжува со тренинзи и натпревари во СЦ „Јане Сандански“ во Скопје. За македонските одбојкари овие три средби ќе бидат последна сериозна проверка пред заминувањето за Софија.
