Засега ништо од пензија. Најдобриот тенисер во историјата на белиот спорт, Новак Ѓоковиќ, имаше тежок крај на својот настап на Отвореното првенство на САД, но од Њујорк пристигнаа вести кои беа многу поважни од еден единствен резултат. Српскиот тениски ас јасно изјави дека нема намера да се пензионира и дека ќе биде дел од најголемите турнири и следната сезона.
Ѓоковиќ предизвика загриженост кај навивачите откако загуби од Аргентинецот Маријано Навоне во првото коло на Отвореното првенство на САД, во натпревар кој траеше пет сета. Дополнително внимание привлекоа и здравствените проблеми со кои се соочи за време на средбата.
Сепак, сите сомнежи за неговите планови сега се отстранети. Новак потврди дека донел одлука да игра на сите четири Гренд слем турнири следната сезона, секако ако неговото здравје му дозволи.
„Одлучив да играм цела сезона на Гренд слем турнирите следната година“, рече Ѓоковиќ.
Таа одлука е особено радосна за неговите навивачи, бидејќи во последните месеци се повеќе се поставуваат прашања за тоа колку долго можеме да го гледаме еден од најголемите тенисери на сите времиња на најголемата сцена.
Новак, сепак, сè уште има јасна мотивација. За него, Гренд слем турнирите имаат посебна тежина, а целта останува иста – да се натпреварува со најдобрите и да атакува на повеќе големи трофеи. Особено е значајно што Ѓоковиќ веќе долго време го истакнува настапот на Олимписките игри во Лос Анџелес во 2028 година како една од своите големи цели. Неговата последна одлука покажува дека плановите за продолжување на кариерата сè уште постојат.
