Кошаркарот на Реал Мадрид, Серхио Љуљ, оствари два големи индивидуални рекорди во шпанската Лига Ендеса. Искусниот бек го одигра својот 700. натпревар во натпреварувањето и стана првиот играч на „кралскиот клуб“ кој постигнал повеќе од 7.000 поени во лигата.
Историскиот момент го одбележа на дуелот против Сурне Билбао Баскет, на кој Реал Мадрид славеше убедливо со 119:84. Љуљ беше најдобар стрелец на средбата со 19 поени, а јубилејот го круниса со уште едно значајно достигнување во својата богата кариера.
Од вкупно 700 настапи во Лига Ендеса, 689 ги има забележано во дресот на Реал Мадрид. Со тоа се израмни со Хуан Карлос Наваро според бројот на натпревари одиграни за еден клуб во ова натпреварување.
Љуљ веќе две децении е дел од Реал Мадрид, со кој освои девет шампионски титули во Шпанија.
