Тренерот на Реал Мадрид, Жозе Мурињо, вели дека не видел ниту една фотографија на која се гледа намерата на Арда Ѓулер да го удри противникот на натпреварот против Севилја. Гостите сметаат дека Турчинот требало да добие црвен картон, но ВАР не реагираше. Мурињо во свој стил порача дека чека докази.
Вечерва во Шпанија фудбалот повторно добива дополнителна димензија. Од Севилја тврдат дека биле ограбени од судиите на „Сантијаго Бернабеу“ и дека едноставно морале да играат 70 минути со играч повеќе.
Арда го удри Пеке по дваесетина минути игра. ВАР-собата не се огласи, а Жозе Мурињо вели дека нема докази дека се случило нешто спорно.
„Лактот на Арда? Не видов ниту еден јасен доказ дека го направил тоа. Ниту еден. Барав да видам, но нема. Нема јасна снимка од она за што зборуваат.
Можам сосема искрено да ви кажам дека, ако еден ден се случи нешто за кое сметам дека одело во наша корист, нема да имам никаков проблем јавно да го кажам тоа. Сепак, мислам дека почесто ќе ни се случува токму спротивното. Тоа е едноставно природен тек на настаните“, изјави Мурињо.
На прашањето дали Арда му кажал нешто, Жозе одговори:
„Арда ми рече дека не го удрил со лакт“, откри Мурињо, а потоа ги изненади новинарите со својот предизвик.
„Следната прес-конференција пред натпревар од Ла Лига е во сабота. Ако дотогаш некој ми покаже фотографија на која се гледа дека Арда го направил тоа, нема да имам проблем да признаам дека навистина се случило. Засега, никаде не сум ја видел“, порача Мурињо.
Реакцијата на Мурињо дополнително ги подгреа тензиите по натпреварот, а ситуацијата од почетокот на средбата очигледно уште некое време ќе биде тема на шпанската јавност.
Португалецот, сепак, остана на ставот дека не сака да донесува заклучоци без јасни докази што би ги потврдиле тврдењата на гостинскиот тим.
Неговите зборови нема да го смират незадоволството во Севилја, особено затоа што таму се убедени дека спорната судиска одлука можела значително да влијае врз текот на натпреварот.
