Ѓоковиќ првпат се огласи по изборите во Србија: Притисоците беа неверојатни!

Новак Ѓоковиќ, по убедливата победа на студентската листа на изборите во Србија, првпат ја коментираше политичката ситуација во земјата. Тенисерот во изминатите години беше изложен на големи притисоци поради поддршката што им ја даде на студентите, а својот став не го соопшти преку социјалните мрежи, туку во Базел, каде што се подготвува за турнир. Во ексклузивно интервју за „Телеграф“ го објасни своето гледиште за изборните резултати.

„Се огласував повеќепати во изминатите неколку години. Мојата поддршка за нив секогаш беше недвосмислена и мислам дека повеќето луѓе кои ја следат ситуацијата знаат каков е мојот став. Би застанал тука. Навистина сум благодарен што уживам посебен статус во нашето општество и голема чест ми е што со години ја имам поддршката од толку многу луѓе.

Од друга страна, понекогаш се чини дека единствено од мене се очекува да реагирам. Но, не би се задржувал премногу на тоа. Сакам само да истакнам дека сум исклучително горд на младите луѓе, на студентите, на нивната истрајност, борба и верба што ги покажаа во изминатите години“, изјави Ѓоковиќ.

„Успеаја да ја разбудат надежта и гордоста“

Говорејќи за атмосферата по објавувањето на изборните резултати, Ѓоковиќ ја истакна важноста на она што го постигнале студентите.

„Притисоците беа неверојатни. Само тие знаат колку труд, сила и волја беа потребни за да се оствари оваа цел. Им честитам за победата. Им се восхитувам. Успеаја да го урнат култот на личноста на еден човек, да го направат целиот процес колективен и да разбудат надеж и гордост кај луѓето.

Имам речиси 40 години. На некои времиња се сеќавам, на други не, но не паметам некогаш да имало толкава возбуда околу гласањето и толку многу луѓе да излегле за да дадат поддршка. Им честитам и на сите луѓе во Србија им посакувам сè најдобро во иднина. Мислам дека сега владее многу позитивна атмосфера и се надевам дека ќе успееме да ја задржиме“, додаде српскиот тенисер, потврдувајќи дека е многу задоволен од изборниот исход.

„Многу сум задоволен. Голема почит за студентите и младите кои се бореа и покажаа силен отпор на притисоците. Начинот на кој се поставија навистина им ја врати гордоста на луѓето, и тоа не само во Србија. Победата е остварена, а сега во нашата земја се појави надеж дека работите ќе тргнат на подобро и дека нè очекува подобра иднина“, истакна Ѓоковиќ.

Тенисерот не сакаше да открие каде се наоѓал во моментот кога биле објавени резултатите.

„Не би зборувал за тоа. Во моментов сум посветен на спортот и на работите поврзани со него, па не би навлегувал во детали. Би останал на тоа дека сум среќен поради ваквиот исход, дека отсекогаш се залагав за тоа и дека им посакувам сè најдобро. Тоа е сè“, кратко порача Ѓоковиќ.