Реал Мадрид во последните години оди по стапките на Барселона со тоа што посветува големо внимание на својата младинска академија, а се чини дека еден исклучително талентиран напаѓач повторно се појави во “Ла Фабрика“.
Станува збор за Микел Лопез, 15-годишен фудбалер кој се смета за еден од најинтересните напаѓачки таленти на својата генерација во Мадрид.
Шпанските медиуми наведуваат дека Лопез неодоливо наликува на Ерлинг Халанд со своите физички карактеристики, стил на игра и инстинкт за постигнување голови во одредени сегменти. Иако има само 15 години, Лопез веќе достигна висина од околу 1,92 метри, додека на само десетгодишна возраст беше висок неверојатни 1,80 метри. Сепак, неговите физички предиспозиции не се единствената причина зошто привлече внимание. Младиот напаѓач веќе има импресивен учинок во постигнувањето голови, а постигна дури 148 гола во младинските категории.
Тој моментално игра како класична „деветка“ за кадетскиот тим на Реал Мадрид, каде што продолжува да покажува зошто од него се очекуваат големи работи.
Тој се издвојува по својата физичка сила и доминација во дуелите, но она што дополнително ги воодушевува скаутите е брзината што ја поседува и покрај неговата висина.
Лопез е многу опасен кога Реал Мадрид ја освојува топката и оди во транзиција, додека завршувањето е едно од неговите најголеми оружја.
Тој веќе го покажа својот талент и во дресот на шпанската репрезентација до 15 години, со која го освои Светското првенство во својата категорија.
