Кошаркарите на Феникс Санс обезбедија пласман во големото финале во НБА лигата со четвртата победа против ЛА Клиперс изборена со 130:103 во финалето на Западната конференција.
Тие ќе се натпреваруваат за престижната титула со победникот од дуелот меѓу Атланта Хоукс и Милвоки Бакс. Херој на вечерта беше ветеранот Крис Пол, кој постигна 41 поен, осум асистенции и четири скока, но на крајот во солзи го заврши мечот.
„Денес бев во мисија: Не смееме да загубиме“, рече Пол по средбата.
„Сите натрупани емоции само излегоа од мене“, призна 36-годишниот кошаркар, кој ќе игра во големото финале за првпат во својата долга кариера.
Феникс, кој дури и не се квалификуваше во плеј-офот во НБА лигата десетпати по ред, повторно ќе игра за шампионскиот прстен за првпат по 28 години.
