Машката одбојкарска репрезентација на Турција е новиот освојувач на Европската Златна лига на ЦЕВ. Во големото финале на Ф4 турнирот во Задар, Хрватска, Турците по голема борба со 3:2 (14-25, 25-22, 26-24, 22-25, 15-6) беа подобри од благиот фаворит Украина, која до ова финале имаше загубено само еден сет.
Украинците одиграа одлично на стартот и без многу проблеми го освоија првиот сет, најавувајќи атак на титулата. Тие 25:14 како да ги отрезнија турските одбојкари, кои во следните два сета покажаа голема борба и решеност да се вратат во мечот. Турција ги освои вториот и третиот сет и дојде до пресврт предност од 2:1 во сетови.
Четвртиот сет повторно им припадна на Украинците, кои по многу нервоза и меѓусебни препукувања со противничките одбојкари, на крајот стигнаа до 25:22 за 2:2.
И кога се очекуваше дека самодовербата е на старана на Украина, Турција го почна тај-брејк сетот маестрално. Поведе убедливо со 8:2 и потоа веќе беше тешко да се направи изненадување.
Со овој триумф, Турците изборија место во Светската Лига на Нации следната сезона.
