Денеска точно на пладне во Нион ќе се одржи ждрепката за четвртфиналето, а потоа и можните двојки за полуфиналето, во Лигата на Шампионите за тековната сезона. Нема веќе “диригирана“ ждрепка, сите осум екипи се ставаат во еден барабан и може да се падне секој со секого, ова е за четвртфиналето. Потоа ќе се влечат и можните двојки за полуфиналето.
Со оглед на тоа какви се екипи стигнаа до оваа фаза јасно е дека се очекуваат мега – пресметки за четвртфиналето, а за полуфиналето и да не говориме.
Имаме три екипи од Шпанија, по две од Англија и Германија, и една од Франција.
ЧЕТВРТФИНАЛИСТИ:
Арсенал (АНГ), Атлетико Мадрид (ШПА), Барселона (ШПА), Баерн Минхен (ГЕР), Борусија Дортмунд (ГЕР), Манчестер Сити (АНГ), ПСЖ (ФРА), Реал Мадрид (ШПА).
Натпреварите од оваа фаза ќе се играат на 9/10 и 16/17 април, додека полуфиналните средби се закажани за 30 април/1 мај и 7/8 мај. Додека финалето се игра на “Вембли“ во Лондон на 1 јуни.
Денеска во Нион, секако во длабока сенка на ждрепката во ЛШ, ќе се одржат и ждрепките за 1/4 финалето во Лигата на Европа и Лигата на Конференции.
