Денеска продолжуваат мечевите од Супер-лигата, на програмата е 14-то коло, а овој викенд имаме два дерби дуели од врвот на табелата. Лидерот Вардар 1961, кој нема пораз оваа сезона ќе гостува во Охрид, мечот е закажан со почеток во 19:30 часот. „Црвено-црните“ во СЦ „Билјанини Извори“ доѓаат после дуелот со Сесвете во рамките на Европската лига каде обезбедија место во главната рунда, додека пак охриѓани имаат голема самодоверба по заверката на осминафиналето во ЕХФ Европскиот Куп.
Езерскиот тим има состав за големи нешта оваа сезона во домашниот шампионат, дали навистина е така ќе дознаеме вечерва, Вардар 1961 ќе биде вистински тест. Првата средба заврши со победа на „црвено-црните“ од 33-31.
Второто дерби се игра утре во Битола кога Пелистер го пречекува Алкалоид, првата средба заврши без победник.
На останатите мечеви Тиквеш после поразот од Алкалоид ќе бара рехабилитација против Струга на домашен терен (17 часот), Радовиш е домаќин на Пролет (17:30 часот), додека пак вториот тим на Пелистер го пречекува Куманово (18 часот), половина час подоцна Прилеп е домаќин на Бутел Скопје.
Лидер на табелата е Вардар 1961 со 26 бода, Пелистер има три помалку, Охрид има 21 бод, додека Алкалоид 20.
