Првото дерби на 14-то коло во Супер-лигата му припадна на Вардар 1961, кој славеше против ГРК Охрид на гостински терен со 26-28 (13-14). И по овој меч избраниците на Иван Чупиќ останаа непоразени во домашниот шампионат, имаат 14 победи во исто толку одиграни меча.
Хориха имаше осум гола од десет обиди кај победникот каде по шест погодоци запишаа Митровиќ и Кавада. На другата страна Стрмљан, Иванковиќ, Крсманчиќ и Ѓукиќ запишаа по пет гола.
„Црвено-црните“ отворија со 1-4, Хориха на стартот на 19-та минута донесе предност од пет гола 6-11. Оваа позитива гостите ја има и во 22-та минута (8-13) по што охриѓани полека, но сигурно ја минираа негативата. Со головите на Ѓукиќ и Крсманчиќ на одморот доближија на 13-14. Во овој дел зовреа и страстите, но на голема среќа тензиите брзо се смирија.
Во второто полувреме Вардар 1961 отвори со 3-1 за 14-17, пропушти шанса да зголеми на плус четири. Но, веќе на средината на второто полувреме гостите запишаа водство од пет гола 17-22.
Во 47-та минута при 19-23 Јанковски заработи директен црвен картон поради неспортски потег. Но, ова не промени ништо бидејќи Вардар 1961 во последните 10 минути влезе со плус пет (20-25). На три и пол минути до крајот Савревски казни грешка на противникот за 23-26, но не беше доволно за пресврт. На крајот Вардар сосема заслужено ги освои бодовите.
