Претпоследното коло од есенскиот дел во Првата женска лига донесе интересни натпревари во кои шампионот Јанта Волеј Кисела Вода и вице-првакот Работнички Скопје во дуели кои се решаваа во тај-брејкот ги совладаа Вардар ЕМ, односно Младост УГД.
Во дуелот на скопските екипи, вардарки влегоа силно мотивирани и тие да го земат „скалпот“ на шампионот, но може да бидат задоволни и со бод. Бранителот на титулата одигра сигурни два сета, во кои имаше убедливо враќање во играта и намали на 2:1, но наместо да го зададе последниот удар, му се случи нов пад во играта. Во тај-брејкот пресуди искуството со кое Јанта Волеј КВ ја прекина лошата серија во првенството.
Работнички Скопје, пак, имаше големи проблеми на гостувањето во Штип, кај Младост УГД. Гостинките отворија со 1:0, но во продолжението Младост УГД се избори за пресврт и водство од 2:1. Штипскиот состав е сериозно решен сезонава да се замеша во трката за една од титулите и тоа го потврдува со играта која ја покажува. Работнички Скопје успеја да ја смири играта, да остане мирен и дисциплиниран во следните два сета и да дојде до двата бода во овој дуел.
Лидерот Наковски Волеј беше убедлив во градското дерби со Струмица жени и нема дилеми дека на првото место ќе го заврши првиот дел од сезоната.
Дуелот од дното меѓу Ускана и Фит Фан Волеј не се одигра поради технички проблем, додека осмото коло кај дамите ќе биде комплетирано в понеделник, кога се игра уште едно дерби во Битола, меѓу новите прволигаши Пелистер Волеј и Газели Волеј, кое ќе има и телевизиски пренос на националниот сервис.
ПРВА ЛИГА ЖЕНИ, 8. КОЛО
УСКАНА – ФИТ ФАН ВОЛЕЈ одложено
НАКОВСКИ ВОЛЕЈ – СТРУМИЦА ЖЕНИ 3:0 (25:20, 25:15, 25:21)
МЛАДОСТ УГД – РАБОТНИЧКИ СКОПЈЕ 2:3 (21:25, 25:21, 25:22, 19:25, 12:15)
ЈАНТА ВОЛЕЈ КВ – ВАРДАР ЕМ 3:2 (23:25, 25:11, 25:18, 23:25, 15:8)
ПЕЛИСТЕР ВОЛЕЈ – ГАЗЕЛИ ВОЛЕЈ 01.12.2025 19:30ч. (ТВ)
