Работнички оствари важна победа против Брера (3-4) на гости во минатото коло и тоа ги зголеми надежите дека може да се обезбеди опстанок во елитата и следната сезона. Но, тие бодови нема да вредат ништо ако денеска не се надополнат со уште нови три, со триумф над последнопласираниот Шкупи.
По подолг период, Работнички се враќа како домаќин на Арената „Тодор Проески“, а натпреварот со Шкупи е закажан од 12 часот.
„Работнички нема друг избор, едноставно мора да оди на победа на секој натпревар. Веруваме дека ќе успееме да славиме, иако во никој случај не го потценуваме противникот“, порачува офанзивецот Никола Манојлов.
Работнички е единствениот тим кој не успеа да го победи Шкупи во првиот круг од шампионатот, играјќи 1-1 на мечот што се одигра во Струга.
ФК Шкупи продолжува со својата борба за прва победа сезонава, но и за првите бодови во пролетниот дел од шампионатот. Досега тимот од Чаир има освоено само еден бод, токму во есенскиот дуел против Работнички, кој заврши со резултат 1-1. Овие две екипи одиграа и пријателски натпревар во подготвителната фаза, во кој „романтичарите“ славеа со убедливи 5-2. Сепак, и покрај тешкотиите со кои се соочуваат оваа сезона, фудбалерите на Шкупи ветуваат максимум на теренот.
„Како и на секој натпревар, така и против Работнички ќе се бориме до последниот атом. Ние како фудбалери ќе го дадеме најдоброто од себе, без оглед на околностите и незавидната ситуација во која се наоѓа нашиот клуб. Наша должност е да останеме професионалци на теренот и да ја извршиме нашата работа најдобро што знаеме“, изјави капитенот на ФК Шкупи, Амар Мелиќи.
