Поранешниот претседател на УЕФА, Мишел Платини, го повика Џани Инфантино да се повлече од функцијата претседател на ФИФА. Французинот остро го критикуваше првиот човек на светскиот фудбал, велејќи дека тој не ја исполнува својата улога како гарант на правилата на играта. Коментарите на Платини беа цитирани од RMC Sport и доаѓаат во услови на тензии околу Инфантино по неговата намера да им даде дел од правата поврзани со Светското првенство на приватни инвеститори.
„Економските проблеми се едно, но мислам дека Инфантино не успеа затоа што тој е гарант на правилата на играта и не ги почитува“, рече Платини.
Поранешниот француски репрезентативец посочи на конкретни одлуки за кои смета дека се спротивни на духот на играта.
„Рекламните паузи на Светското првенство и подолгата пауза на полувремето во финалето не се дел од фудбалот, а одземањето на црвениот картон на американскиот репрезентативец Фоларин Балогун е најлошото нешто што некогаш се случило. Тој е гарант на правилата на играта, но не ги почитува, па затоа мора да си оди“, додаде Платини.
Инфантино е под сериозен притисок во последните недели по презентацијата на идејата за продажба на правата за Светското првенство на приватни инвеститори за милијарди долари.
Предлогот предизвика силна реакција, вклучително и од УЕФА, која се закани со бојкот на Светското првенство.
Инфантино потоа го повлече проектот, а УЕФА ја отфрли заканата за бојкот. Сепак, тензијата не е завршена и според дадените информации, европското седиште продолжува да дискутира за други мерки против претседателот на ФИФА, вклучително и можни правни чекори.
