Со политичките промени неизбежни се и промените во српскиот спорт. Со денови се шпекулираше дека ќе има оставки во РК Партизан, а за тоа извести „Mozzart Sport“ по седницата на Управниот одбор.
Ракометниот клуб Партизан во изминатите неколку години беше државен проект. Тоа не го криеја ниту во таборот на црно-белите. Претседателот Милјан Жугиќ во неколку наврати отворено го истакнуваше тоа.
По две последователни шампионски титули на Србија, четирите трофеи освоени минатата сезона и доминацијата на домашната сцена, ова лето Партизан за првпат по 13 години настапи во Лигата на шампионите. На клупата пристигна и трофејниот шпански стратег Раул Гонзалес.
Сепак, идилата кратко траеше. По промената на власта на изборите на 25 октомври, стана јасно дека Партизан е најзагрозен.
Во клупските простории на стадионот на Партизан се одржа седница на Управниот одбор. Според информациите на „Mozzart Sport“, конечни одлуки за заминување на раководните лица сè уште не се донесени, но се очекува претседателот на црно-белите, Милјан Жугиќ, следната недела да поднесе оставка. Се очекува заминување од клубот и на членовите на Управниот одбор, потпретседателот Дане Шијан, Момчило Мандиќ и Зоран Анѓелковиќ.
Во согласност со тоа, се очекува и заминување на „алфата и омегата“ на клубот, Владимир Мандиќ.
РК Партизан доцна синоќа, по написите во медиумите, се огласи преку објава на Инстаграм. Соопштението, сепак, не остави впечаток на сериозен одговор со оглед на реномето на клубот и моменталната ситуација во која се наоѓа.
„Денеска се одржа седница на Управниот одбор на РК Партизан АдмиралБет, на која се разговараше за претстојниот настап на клубот во плеј-офот на Лигата на Европа, потенцијалните трансфери на крајот од сезоната, идното финансирање, зголемувањето на бројот на членови на Управниот одбор и проширувањето на спонзорскиот пул.
Новата седница е закажана за понеделник, а јавноста за сите актуелности и одлуки ќе биде навремено информирана.“
