Хрватскиот ракометен сојуз му подготвува отказ на селекторот Хрвоје Хорват. Така може да се протолкува последната изјава на првиот човек на хрватскиот ракомет дадена во едно ТВ-интервју вчера во очекување на конечниот став на Сојузот.
„Морам да признаам дека од првиот натпревар се беше една голема импровизација, што се виде и на теренот. Она што можам да го направам е да им се заблагодарам на сите играчи кои го ризикуваа својот живот, здравје и нивните кариери со настапот на едно вакво ЕП“, вели Томислав Граховац.
За настапот на Хрватска и пласманот на крајот на првенството тој додаде:
„Секако дека осмото место не може да биде успех и не можеме да кажеме дека добро се снајдовме. Факт е дека првенството беше, ако можам така да кажам, „специфично“. Не само Хрватска, туку и многу репрезентации имаа проблеми со короната и на крајот можеме да кажеме дека покрај некој квалитет, во финалето стигнаа и репрезентациите со најмалку заразени играчи“, изјави претседателот на Хрватскиот ракометен сојуз, додавајќи дека одлуката за иднината на Хорват на кормилото ќе ја донесе Управниот одбор.
