МЗТ Скопје и Општина Аеродром од 13. до 17. април ќе бидат организатори на завршниот турнир во АБА 2-лига. За првпат во историјата еден македонски тим ќе биде домаќин на едно вакво повисоко натпреварување во регионот.
Актуелниот македонски првак на стартот ќе игра против Сутјеска, дуелот е закажан за утре со почеток во 18 часот. Добро е познато дека приходите од продадените билети ќе одат во фондацијата Марко Божиновски.
“Големо задоволство е да бидеме домаќини на овој турнир кој е добра можност за нашиот МЗТ Скопје да се покаже како добар домаќин. Овој турнир е од хуманитарна природа, средствата од билетите ќе бидат наменети за фондацијата Марко Божиновски која се грижи за спортот во Аеродром. Очекуваме одлична спортска атмосфера и полни трибини. Благодарност за помошта на Град Скопје и АБА 2-лига која ни ја довери организацијата. На крајот на денот како човек кој израснал со МЗТ Скопје се надевам на финале во недела и пласман на нашиот клуб во АБА 1“, изјави градоначалникот на Општина Аеродром, Тимчо Муцунски.
Покрај „таткото“ на Аеродром на прес-конференцијата беше спортскиот директор на АБА, Милија Војиновиќ.
„Немавме дилема МЗТ Скопје да биде домаќин на овој турнир. МЗТ Скопје е еден од нашите најредовни учесници во АБА 1 и АБА 2 лигата. МЗТ беше прв по регуларниот дел. Од утре почнува круната на сезона, ќе се знае кој ќе оди директно во АБА 1, а кој ќе игра бараж. Се одиграа 98 меча во регуларниот дел, а сега се се сведува на овие 7 меча“.
Филип Ѓоревски извршниот директор на МЗТ Скопје посака следните денови да бидат вистински празник на кошарката. Секако „сино-белите“ да се вратат во јадранската елита.
Билетите за еден меч се продаваат по цена од 100 денари, додека цената за блок карти за еден ден е300 денари.
