Николај Јакобсен, како селектор на Данска го направи невозможното. Она што до ова Светско првенство се чинеше дека е тешко остварливо, синоќа се претвори во реалност.
Селекторот на старо-новиот светски првак и неговите момци станаа првата репрезентација која успеала да подигне три пехари во низа на овој шампионат. И не е само тоа. Јакобсен како предводник на Данска има серија од 28 меча без пораз на Мундијалите, 26 победи и само две ремија.
Тој на чело на Данска дојде во 2017 година, засега пишува неверојатна приказна. Неговата репрезентација на последното Светско првенство покажа дека засега е број еден ракометна сила, одигра неверојатно, покажа квалитет и сила, кој беше едноставно тежок за пратење од страна на противниците.
„Немам многу паметни зборови во овој момент, можам само да кажам дека ова е фантазија. Да се биде во оваа ситуација, да се направи нешто што никој досега не го направил во историјата. Фокусот што го имавме на овој турнир е нешто што досега не сум го видел, како и начинот на кој момците го одиграа финалето против неверојатно силен тим“, изјави Николај Јакобсен.
Лауге прерасна во херој на финалето иако не беше таму за време на турнирот, беше блиску до враќање дома.
„Имаме многу врвни играчи, а во финалето ни требаше придонесот на секој што ќе стапне на теренот. Имавме посебен, дополнителен дел од тренингот посветен на Лауге за да видиме колку е подготвен, дали неговото тело може да го издржи напорот на финалето. Тој беше одлучувачки фактор во вториот дел.
Видовте и што ни донесе влегувањето на Менса Ларсен во вториот дел, тој веднаш влезе и постигна два гола при прекин на натпреварот. Потоа имаше одличен гол на Питлик, сите само придонесоа. Неверојатна игра на нашата репрезентација“, заклучи данскиот селектор.
