Сампдорија доживеа дебакл на гостувањето кај Фиорентина (пораз од 5:0) со што тимот од Џенова во секој момент ќе се лизне во Серија Б. Сампдорија е последна со 17 бодови по 32 кола, дури 10 помалку од првата екипа која е во сигурната зона, а до крајот остануваат уште шест натпревари.
Италијанските медиуми пишуваат дека тренерот Дејан Станковиќ по мечот со Фиорентина поднел оставка и тоа им го кажал на фудбалерите, сметајќи дека е најдобро сезоната во Сампдорија да ја доврши некој друг тренер.
Неколку пати Станковиќ посочи дека не се предава и ќе се бори додека може, меѓутоа не успева да ја помрдне екипата која бележи катастрофални резултати, незадоволството кај навивачите е големо и се поблиску е испаѓање во понизок ранг за првпат после 12 години.
А од раководството сакаат тој да ја доврши сезоната и да почнат од ново, без разлика дали ќе останат во најсилната лига и ќе паднат едно ниво подоле.
„Ако јас сум проблем го прифаќам тоа со достоинство и гордост. Дадов се од себе и не жалам за ништо. Не ги обвинувајте играчите, овие 5:0 се моја вина. Да зборуваме за тоа“, нагласи Станковиќ на пресот по мечот.
Србинот на 26 меча на кормилото оствари само четири победи, шест ремија и 16 порази.
Тој беше прашан дали сака да остане „во возот кој тоне“ и даде критичен одговор.
„Има прозорци и излези за итни случаи. Јас сум емотивна и директна личност. Не знам дали е позитивно или негативно. Мораме да одиме до крај, но мора да одлучиме со која брзина одиме. Ако е моја вина, го прифаќам тоа. Мораме да ги оставиме настрана проблемите кои се од надвор, има начини за губење и тоа беше неприфатливо“, додаде Србинот.
Ако Сампдорија испадне, можно е клубот да падне во банкрот и да биде принуден повторно да започне од Серија Д, бидејќи сегашниот покровител Масимо Фереро одби да го продаде на американски инвеститори.
