Иако Ѓоко Хаџиевски, некогашниот селектор и еден од нашите најдобри и најпознати тренери веќе една недела и официјално е нов стратег на Хаџер од С. Арабија, пред малку излезе со соопштение и ФК Вардар. Клуб каде што Хаџиевски беше спортски директор. Во соопштението се вели дека тој и натаму ќе ја обавува почесната функција – спортски директор на Вардар.
Соопштението на ФК Вардар ви го пренесуваме во целост:
„ Во името на клубот и во името на големата фудбалска легенда Ѓоко Хаџиевски, би сакале на целокупната јавноста да и ја соопштиме веста дека и покрај новиот тренерски ангажман во Саудиска Арабија, сепак почесната функција – спортски директор на ФК Вардар, ќе продолжи да ја одработува и понатаму, чесно и одговорно како и досега.
Важно е да напоменеме дека Хаџиевски во клубот работеше без притоа да потпише било каков договор , ниту па да побара било каков финансиски надоместок за сработеното.
Дојде затоа што почувствува потреба да му помогне на Вардар, и тоа во период кога многумина други Вардарови легенди го вртат грбот и кои за жал, се амнестираат себеси по прашањето на ФК Вардар.
Соработката помеѓу клубот и господинот Хаџиевски продолжува и понатаму. Борбата за Вардар продолжува и понатаму!
