Саутемптон вечерва соопшти дека „неволно се согласиле“ да му дозволат на фудбалскиот директор Џејсон Вилкокс да замине во Манчестер Јунајтед. Двата клуба се договориле за „прифатлива такса за обештетување“ да му овозможат на Вилкокс да ја прифати понудата на премиерлигашот.
Поранешниот крилен напаѓач на Блекбурн Роверс му се приклучи на клубот од Чемпионшип минатото лето. Вилкокс оди во Јунајтед како технички директор, каде клубот рече дека „ќе работи со сите технички области на фудбалскиот оддел“.
Тој помина 11 години во Манчестер Сити, каде што беше директор на академијата пред да се пресели на јужниот брег.
„Иако клубот е природно разочаран што престојот на Џејсон во Саутемптон трае само девет месеци, му посакуваме се најдобро во иднина“, објави Саутемптон во соопштението.
Манчестер Јунајтед сега оди по спортскиот директор на Њукасл Јунајтед, Ден Ешворт.
