Аукцијата на украдената Златна топка, која во 1986 година ја освои легендарниот аргентински фудбалер Диего Армандо Марадона, е прекината со одлука на Апелациониот суд во Версај. Судот на тој начин ја прифати жалбата на двете ќерки на Марадона, кои тврдат дека Златната топка е сопственост на семејството на починатиот фудбалер и дека не може да се продаде на аукција.
Марадона ја доби Златната топка како најдобар играч на Светското првенство во Мексико во 1986 година, каде што ја предводеше Аргентина до светскиот шампионат. Речиси сите негови мечеви на тој шампионат беа легендарни, особено мечот против Англија каде постигна еден гол, како што го нарече, „од божја рака“, а другиот по дриблинг на бројни англиски фудбалери.
Тоа беше четвртфинална победа против Англија од 2:1, додека Аргентина во финалето ја победи Западна Германија со 3:2.
Марадона почина во 2020 година, а неговите наследници тврдат дека дотичната Златна топка е украдена и тврдат дека сегашниот сопственик нема право да ја продаде. Нивниот адвокат рече дека ќе побараат од судот одземање на трофејот и дека ќе поднесат пријава за кражба.
Околу тој трофеј кружеа разни гласини. Се зборуваше дека Марадона го изгубил во игра покер или дека го продал за да ги исплати долговите. Исто така, беше кажано дека Марадона го чувал во банка во Неапол, која ја ограбиле локални криминалци во текот на 1989 година, додека тој играл за Наполи. Наследниците на Марадона веруваат дека трофејот е украден од банката.
