Ракометарките на Норвешка го добија големото скандинавско дерби со Данска на стартот на втората фаза од натпреварите на Европското првенство. Вечерва во Виена, Норвежанките славеа со 27:24 и успеаја да останат на врвот на табелата во новоформираната група „2“ заедно со Холандија, која исто така има максимален учинок во досегашниот дел од настапите.
Норвешка имаше подобар финиш во првото, и одлично отворање на второто полувреме што резултираше со предност од 4-5 гола разлика, кои беа пресудни за конечниот резултат. Скогранд со 7 гола беше најефикасна во победничкиот тим, додека кај Данска, Хансен постигна 6.
Унгарија многу полесно од очекуваното славеше над Црна Гора. На мечот во дебрецин, Унгарките пред своја публика со 26:20 дојдоа до нова победа со која стигнаа до четири бода и се израмнија со Франција на врвот на табелата.
Кљубер со 6 гола беше лидер во домашниот тим, додека кај Црна Гора, Јауковиќ постигна 5 погодоци.