Капитенот на Алкалоид, Игор Ѓоргиев и неговите соиграчи ги чека нов европски предизвик, битката за пласман во финалето на ЕХФ Европскиот Куп. Противник на актуелниот освојувач на Купот на Македонија е Рунар, првиот меч се игра во недела во Автокоманда во 19 часот.
„Пред нас е натпревар од огромно значење, прво европско полуфинале за Алкалоид. Ова е голем момент за нашиот клуб, но и за македонскиот ракомет, како екипа сме горди што успеавме да стигнеме до овде и да се бориме за едно европско финале. Ќе играме со Рунар, тим што е склоп од искусни и од млади играчи, инсистираат на брз и модерен ракомет во текот на сите 60 минути. Првиот меч го играме дома, пред нашата публика, ги повикувам сите љубители на ракометот да дојдат да ни дадат поддршка, да бидат нашиот седми играч на патот кон историско финале“, изјави Ѓоргиев на денешната прес-конференција.
Ѓоргиев додаде дека е тешко да се игра без клучни играчи, но за успех ќе биде потребна колективна игра.
„Имаме проблеми со отсуство на неколку клучни играчи. Како капитен, а и заедно со сите други ракометари, свесни сме дека можеме да дојдеме до врвни резултати само ако играме врвно на колективен план. Имаме раст во формата на тој колективен план и треба да продолжиме ако сакаме да стигнеме до посакуваниот резултат, како на овие претстојни европски натпревари, така и во македонскиот плејоф“, додаде капитенот на Алкалоид.
