Македонската кошаркарска репрезентација денеск (18 часот) во Даблин против Ирска го игра вториот претквалификациски меч за пласман на Европското првенство во 2029 година.
Капитенот, Војдан Стојановски го најави дуелот против Ирска потенцирајќи дека до нова победа можат да дојдат само со максимална борба како против Азербејџан. Тој е убеден дека Македонија може да игра уште подобро, а тоа ќе биде возможно кога во составот ќе се вратат Маслинко и Димитријевиќ.
„Ирците се поквалитетен противник од Азербејџан. Но она што ние мораме да го сториме е да ја оправдаме фаворитската улога на терен. Најважно е да ја играме нашата игра, да покажеме 40 минути борба како против Азербејџан, ако го сториме тоа резултатот нема да изостане.
Убедливо го совладавме Азербејџан, но искрено, тоа не е мерило за квалитетот бидејќи сме далеку подобра селекција. Она што можам да го кажам е дека имаме добра група на момци кои работат напорно, гинат за секоја топка на теренот и покажуваат карактер, што е најава за уште подобри резултати во иднина. Јас сум убеден дека можеме да играме далеку поквалитетно, особено кога би биле комплетни со враќањето на Димитријевиќ и на Маслинко“, вели Војдан Стојановски.
Искусниот репрезентативец едвај чека Македонија да го завери пласманот во квлификациите и таму да играат со репрезентации кои се на нивото на нашиот најдобар национален тим.
„Ме радува тоа што атмосферата е на највисоко ниво. Имаме добри услови за работа, што е предуслов и за добри резултати. Искрено, мислма дека не ни е местото во оваа група. Односно дека имаме многу поголем квалитет од нив, а тоа сакаме да го покажеме на терен. Да бидеме први во групата и да се пласираме во главните квалификации, и да играме со репрезентации кои се на нашето ниво“.
