Трчањето е повеќе од рутина – тоа е навика што станува дел од секојдневието, ритам што те води напред и простор каде секој си поставува нови лични цели. За активните тркачи, секој излезен километар е чекор кон подобра форма, поголема издржливост и посилен фокус, но и начин да се остане доследен на сопствениот lifestyle.
За активните тркачи, 10 километри не се случаен избор. Тоа е дистанца што бара подготовка, стратегија и искуство. Тоа е предизвик кој не се освојува случајно, туку со време, труд и јасна цел. Токму затоа, секоја 10K трка носи посебно значење – како тест на форма, но и како личен репер за тоа колку далеку може да се оди.
Во таа насока, HalkEco Skopje Run 10K се позиционира како еден од настаните што ги обединува токму овие приказни, на луѓе кои веќе го живеат активниот начин на живот и бараат нови предизвици. Настанот претставува можност да се излезе од секојдневната рутина и да се стане дел од заедничка енергија што се чувствува низ улиците на градот.
HalkEco Skopje Run 10K оваа година ќе се одржи на 10 мај, со почеток во 9.00 часот на бул. Илинден, во близина на фонтаната „Лотус“, каде што ќе биде и стартот и целта на трката. Трасата ќе се одвива по бул. Илинденска и дел од бул. Партизански Одреди.
Пријавувањето за учество е отворено до 29 април 2026 година или до пополнување на предвидениот број на учесници и може да се изврши на овој ЛИНК, а котизацијата изнесува 1300 денари.
Дополнителна вредност на овогодинешното издание е и можноста учесниците да придонесат за поширока општествена цел. Во соработка со eCrowd, тркачите ќе можат да донираат средства и да станат дел од иницијатива која покажува дека трчањето може да има и хуман аспект. Така, секој истрчан километар добива уште поголемо значење – не само како личен успех, туку и како придонес за заедницата.
Организатор на трката е Сојузот на спортови на Скопје, во соработка со атлетските клубови Скопски Маратон и Работнички, како и со поддршка од Министерството за внатрешни работи на Република Македонија. Насловен спонзор на HalkEco Скопје Трча 10КМ е Халк Банка, додека покровители се Министерството за спорт и Град Скопје, со значајна поддршка и од бројни партнери и спонзори.
