Од 12 часот се одиграа пет натпревари од 37.коло во Серија А. Се разбира дека за нас најинтересно беше на мечот Пиза – Наполи 0:3, со оглед на тоа што кај гостите стартер беше нашиот Елиф Елмас.
Дијамантот беше одличен, посебно во таа 27.минута кога прекрасно, од корнер, асистираше до Рахмани за 0:2. Претходно МекТоминеј погоди за 0:1 во 21.минута, конечните 0:3 беа дело на Хојлунд.
Инаку Дијамантот во 38.минута имаше супер шанса за гол, но не успеа да реализира.
Во 52.минута Елмас влезе во “клинч“ со домашниот играч Калабрези, по што и двајцата добија жолти картони. Неколку минути подоцна тренерот Антонио го повлече од игра нашиот репрезентативец кој очигледно беше нервозен.
Со оваа победа Наполи и дефинитивно го потврди пласманот во Лигата на Шампионите.
На останатите мечеви, кои беа важни за пласман во ЛШ, во дербито на Рим, Рома со 2:0 славеше против Лацио и тоа со двата гола на Манцини. И двете екипи мечот го завршија со играч помалку по исклучувањето на Франца и Ровели.
Комо ја победи Парма со 1:0 со голот на Морено, а Јувентус на свој терен беше совладан од Фиорентина со 0:2, и тоа со головите на Ндур и Мандрагора.
Милан на гости кај Џенова славеше со 1:2. Нкунку и Атекаме беа стрелци за гостите, а Васкез кај домашните.
