Фудбалската репрезентација на Белгија одигра фантастичен натпревар и го декласираше тимот на САД со 4-1 во Сиетл за пласман во четвртфиналето на Светското првенство. Американците скапо платија за грешките во одбраната, кои Белгијците ги искористија во првото полувреме, а дополнителниот удар дојде на почетокот на второто полувреме кога голманот Мет Фриз ја изгуби контролата врз топката пред сопствениот гол. Ромелу Лукаку го постигна четвртиот гол во третата минута од судиското продолжение по уште еден подарок од одбраната на САД.
Малик Тилман го израмни резултатот на 1-1 на средината од првото полувреме со својот втор гол од слободен удар на турнирот, но Американците примија уште еден гол само 61 секунда подоцна. Де Кетелаере ја доведе Белгија во водство во осмата минута, а потоа постигна уште еден гол во 33-тата минута. Тој му асистираше на Ханс Ванакен за третиот гол во 57-мата минута.
Селекторот на САД, Маурисио Покетино, не го криеше своето разочарување по натпреварот.
„Сите од самиот почеток видоа дека не бевме поврзани со играта. Тоа е процес на учење. Мораме да ја анализираме таа игра и мора да видиме зошто не ѝ пристапивме на ист начин како и на остатокот од Светското првенство“, изјави тој.
Белгија дојде до осминафиналето на Светското првенство по вторпат во последните 12 години и ја продолжи својата серија без пораз на 18 натпревари.
Во четвртфиналето во петок во Инглвуд ќе играат против Шпанија за место во полуфиналето.
