Тенисерката број еден во светот, Арина Сабаленка, потврди дека ќе се натпреварува во мешани двојки со Новак Ѓоковиќ на Отвореното првенство на САД. Двајцата се пријавија за турнирот, кој ќе се игра повторно оваа година според изменетите правила. Сабаленка ќе биде партнерка на Ѓоковиќ наместо Олга Даниловиќ, со која играше минатата година. Потврдата дојде по победата на белоруската тенисерка во второто коло во Синсинати против Гибсон, додека Ѓоковиќ веќе го заврши својот настап на тој турнир со пораз од Тиранте.
По натпреварот во Синсинати, новинарите ја прашаа кој ја иницираше соработката. На прашањето дали гласините за тимот Арина-Ноле се вистинити и кој кому прв му ја испратил пораката, Сабаленка се насмеа.
„Знаеш, ме молеше да играм со него“, одговори таа со насмевка. „Реков: „Знаеш што… Секако, легендо, ќе ти помогнам. Ајде да се обидеме да се забавуваме и да ја освоиме титулата.“ Значи, претпоставувам дека е вистина. Играме. Ќе биде многу забавно и навистина се радувам на тоа.“
Ѓоковиќ и Сабаленка се познаваат со години и се во добри приватни односи. Нивните семејства исто така се дружат, а Ѓоковиќ соработува и со свршеникот на Арина Сабаленка. Пред неколку недели, Сабаленка веќе ги објави своите високи амбиции.
„Се надевам дека овој пат сите ќе бидеме здрави! Многу сум возбудена. Мислам дека ќе биде забавно, а играњето со Новак е секогаш забавно“, рече таа тогаш. „Што се однесува до мешаните двојки, играв само еднаш во животот на Гренд слем турнири. Сега одиме со полна сила до крајот. Целиме само кон титулата, верувам дека тоа е нашата цел, па мислам дека ќе биде и забавно и интензивно.“
Организаторите на УС Опен претходно ја објавија листата на учесници на специјалниот турнир, кој ќе се игра на 25 и 26 август, пред почетокот на главниот дел од натпреварувањето. Меѓу пријавените парови, посебно внимание привлекоа Новак Ѓоковиќ и Арина Сабаленка.
Новиот формат на мешани двојки, воведен минатата година, наиде на одличен прием кај публиката. Натпреварите траат пократко од стандардните, а турнирот се одржува непосредно пред почетокот на главните натпревари во поединечна конкуренција.
Ѓоковиќ и Сабаленка не се единствениот познат пар пријавен за турнирот. Конкуренција ќе им бидат Елена Рибакина и Тејлор Фриц, Мира Андреева и Андреј Рубљов, како и Ига Швјонтек и Каспер Руд.
За турнирот се пријавени и Дијана Шнајдер и Данил Медведев, Тејлор Таунсенд и Александар Зверев, како и Наоми Осака и Кеи Нишикори.
