Чаби Алонсо го имаше своето деби на клупата на Челзи во победата од 3-2 против Фулам, клуб кој исто така ја започна новата сезона под водство на новиот менаџер, Алваро Арбело.
Токму Арбелоа го замени Алонсо на клупата на Реал Мадрид во јануари оваа година, што ѝ даде нова димензија на приказната за двајцата поранешни соиграчи. Заминувањето на Алонсо од Мадрид следеше по турбулентен период, при што медиумите известуваа за тензиите со Винисиус Жуниор и затегнатите односи со клучните играчи.
Легендата на Ливерпул и поранешен соиграч на Алонсо, Џејми Карагер, верува дека проблемите во Мадрид имале повеќе врска со играчите отколку со самиот тренер.
„Чаби Алонсо ја изгуби работата поради Винисиус Жуниор. Тој не беше задоволен од ситуацијата. Отиде да се пожали кај сопственикот и беше кажано дека нема да потпише нов договор“, рече Карагер. „На крајот, Реал Мадрид, како што секогаш прави, застана на страната на играчот, го отпушти тренерот, а потоа го донесе неговиот пријател, Алваро Арбеола.“
И покрај заминувањето на Алонсо, легендата на Манчестер Јунајтед, Гари Невил, не мисли дека тој период треба да влијае на перцепцијата за Алонсо сега кога тој го презема Челзи.
„Не мислам дека она што Алонсо го направи во Реал Мадрид воопшто е одраз на неговата способност. Тоа е одраз на тие играчи“, рече Невил.
„Да бидеме искрени, тие играчи… Мбапе го доживеа тоа во ПСЖ, каде што играше со Нејмар и Меси и тие не вршеа притисок врз одбраната на противникот. Луис Енрике очигледно го промени тоа со млади играчи кои се подготвени да работат така“, рече Невил. „Затоа не мислам дека тоа е одраз на Алонсо. Челзи има одличен тренер и воопшто не треба да се грижи за тоа што се случи во Мадрид.“
Невил дополнително го нагласи специфичниот предизвик за водење на Реал Мадрид. „Понекогаш таму има вистински хаос, мора да бидете посебен карактер за да го водите тој клуб“, додаде тој. Алонсо сега е целосно фокусиран на Челзи. Со победата во првото коло и освојувањето на трите бода, тој успешно го започна својот мандат на Стемфорд Бриџ.
