Литванскиот шампион Жалгирис ја подигна финансиската рамка за сезоната 2026/27.
На годишната презентација во вторникот, претседателот на клубот Паулиус Јанкyнас и спортскиот директор Гедиминас Навикас го претставија буџетот од 28,8 милиони евра, пред оданочување.
Од вкупната сума, 19,7 милиони евра се издвоени директно за платите на играчите и стручниот штаб.
Овие бројки претставуваат значително зголемување на финансиската моќ на клубот во споредба со претходните години.
За реализација на оваа сезона, клубот од Каунас планира приходи од 26,8 милиони евра пред почетокот на плејофот.
Овој план доаѓа по исклучително успешната финансиска година. Минатата сезона литванскиот гигант првично проектираше приходи од 18,8 милиони евра, но поради одличните резултати и зголемените приходи, на крајот остварија 24 милиони евра. Таа сума помогна да се покријат вкупните трошоци од 24,8 милиони евра, од кои 14,5 милиони евра беа наменети за платите на тимот.
Зголемувањето на буџетот за плати јасно ја потврдува намерата на клубот да ги надгради резултатите од минатата сезона. Со Томас Масиулис на тренерската позиција и со искусните Јонас Валанчиунас и Едгарас Улановас на теренот, тимот има сериозна поддршка во обидот да се наметне во конкуренција на најдобрите европски тимови.
Откако минатата сезона го освои петтото место во Евролигата и беше елиминиран од Фенербахче Беко во плејофот, раководството на клубот го користи финансискиот раст за да ги одбрани домашните титули и да направи уште поголем исчекор на европската сцена.
Жалгирис ја започна сезоната во литванската Бетсон ЛКЛ лига со две последователни победи минатата недела. Во четврток ќе ја започне и сезоната во регуларниот дел од Евролигата на гостински терен, со натпревар против Црвена Звезда во „Белград Арена“.
