✍ Марија Ковачева
Во „Женски Спортски Приказни“ секогаш раскажуваме за уникатни спортистки и лидерки. Овој петок нашата приказна се вика „Евросет“ – тениски клуб со 26-годишна традиција и три сестри кои успешно се грижат за ова специјално место.
Од моментот кога за првпат ќе го посетите, знаете дека не станува збор за обичен тениски комплекс, туку за место кое е изградено со многу љубов. Тука насмевките и љубезноста се дел од секојдневието. Тениските терени, кафебарот и зеленилото прават убав спој, место на кое лесно заборавате дека сте во Скопје, место на кое сакате повторно да се вратите, а можеби и да го засакате тенисот на некој поинаков начин.
А за оние кои сакаат да се разбудат во овој мал рај, комплексот има и сместувачки капацитет.
Тенискиот клуб „Евросет“ е семејна традиција. Го изградиле, Зоран и Мира Божиновски, родителите на трите сестри, Кристина Поповска, Марјана Скварча и Татјана Костовска, кои денес успешно и со голема љубов се грижат за клубот. За нив „Евросет“ не е само работа, туку составен дел од нивниот живот.
Денес приказната ја продолжуваат трите сестри, секоја со својата улога, но сите со иста желба – да го зачуваат она што нивните родители го создале и да продолжат да го развиваат клубот.
Додека уживате во своето кафе во овој тениски клуб можете да сретнете познати спортски имиња како Лина Ѓорческа, Калин Ивановски, Елиф Елмас, Благоја Милевски, Владо Илиевски, Предраг Русевски, Ренато Вугринец…
Приказната за „Евросет“ ни ја раскажува Кики, поранешна тенисерка, која денес е посветена на работата со најмладите. Таа го пренесува своето знаење, но уште поважно, се обидува да им ја пренесе љубовта кон тенисот, онаа љубов поради која и самата некогаш го земала рекетот во рака.
🥎Како вашите родители пред 26 години дошле до идејата да го создадат „Евросет“?
„Моите родители прво ме запишаа на тенис во друг клуб. Токму од таму се роди идејата да изградат сопствен тениски терен, за да имам место каде што ќе можам да тренирам и да се развивам.
Со текот на времето, идејата прерасна во нешто многу поголемо. Во соработка со професорот по архитектура Ѓорѓи Константинов, го одбравме овој проект и почнавме да ја градиме приказната на денешниот комплекс, кој има четири тениски терени, кафетерија и седум соби за сместување.
Од една мала семејна идеја и љубов кон тенисот, се роди место кое денес е дом на многу тенисери, деца, тренери и гости“, вели Кики.
🥎Заедно со твоите сестри растевте со „Евросет“. Дали уште на почетоците сте размислувале дека еден ден вие ќе ја продолжите приказната?
„Искрено, не. Кога почнавме, никој од нас не размислуваше дека еден ден ние ќе ја продолжиме приказната. „Евросет“ едноставно беше дел од нашето детство и од нашиот секојдневен живот. Со сестрите растевме заедно со клубот – гледавме како се гради, како се развива и како од една идеја на нашите родители станува вистински комплекс.
Дури подоцна, кога пораснавме и почнавме активно да се вклучуваме во работата, сфативме дека ова е нешто што ни припаѓа и што сакаме да го продолжиме. Денес чувствуваме голема одговорност, но и огромна чест што можеме да ја продолжиме приказната што ја започнаа нашите родители и да ѝ дадеме наш печат, без да ја изгубиме вредноста и духот со кои е создаден „Евросет“.
🥎 Денес заедно успешно го водите клубот. Што е важно за да се задржи магијата и квалитетот на една долгогодишна семејна традиција?
„Мислам дека најважно е да не се заборави од каде сме почнале. „Евросет“ е создаден од љубов кон тенисот, голема посветеност и визија на нашите родители, и токму тоа сакаме да го зачуваме.
За мене, квалитетот се одржува со работа, посветеност и внимание на секој детал – од тренингот и односот со децата и родителите, до атмосферата во клубот. А магијата, сепак, е во луѓето. Во тоа што кога ќе дојдеш во „Евросет“, да се чувствуваш како дел од едно семејство, а не само како корисник на тениски терен.
Сакаме да ја почитуваме традицијата, но во исто време да се развиваме и да одиме напред. Мислам дека токму балансот меѓу она што сме биле и она што сакаме да станеме е клучен за една семејна приказна да трае со генерации“.
🥎Вашиот клуб е домаќин на повеќе турнири. Оваа година кај вас се одржа Државното тениско првенство за ветерани, имате и традиционален сопствен турнир на кој се пријавуваат многу тенисери. Кои други настани би ги издвоила? Често пати можеме да видиме дека познати јавни личности се ваши гости?
„Да, навистина сме среќни што „Евросет“ низ годините стана место каде што се одржуваат различни тениски настани и турнири. Оваа година посебно би го издвоила Државното првенство за ветерани, кое ни беше особена чест да го организираме, како и нашиот традиционален „Евросет“ турнир, кој секоја година привлекува сè поголем број тенисери.
Покрај натпреварувачкиот дел, посебно ни е важно клубот да биде место каде што луѓето ќе се чувствуваат пријатно и ќе сакаат да се вратат. Затоа често организираме и различни спортски и друштвени собири, а ни претставува особено задоволство што низ клубот поминуваат и познати личности од спортскиот, јавниот и бизнис-светот.
Мислам дека тоа е и дел од магијата на „Евросет“ – на истото место можете да видите деца кои го прават своето прво запознавање со тенисот, професионалци и ветерани кои се натпреваруваат, но и познати гости кои доаѓаат да ја почувствуваат атмосферата. Сакаме „Евросет“ да биде место кое ги поврзува луѓето преку спортот, без разлика на возраст, ниво или професија“.
🥎 Кики, како почна твојата приказна во тенисот? Долго време се градеше професионално во овој спорт.
„Мојата приказна во тенисот започна многу рано, уште како дете. Родителите ме запишаа на тенис во еден клуб и од првите тренинзи некако се пронајдов во овој спорт. Со текот на времето, тенисот стана моја голема љубов, но и сериозна одговорност.
Работата, дисциплината и желбата да напредувам ме однесоа на професионален пат и до две титули државен првак. Години посветив на тренинг, натпревари и патувања, и тенисот ме изгради не само како спортист, туку и како личност.
Денес, иако сум во поинаква улога, сè што сум научила како играч го пренесувам во работата со децата и тенисерите. Затоа можам да кажам дека тенисот не е само дел од мојата кариера – тој е дел од мене“.
🥎Што е она што го научи од сопствената кариера, а денес најмногу се обидуваш да им го пренесеш на децата кои доаѓаат да тренираат?
„Најмногу сакам да им пренесам дека талентот е важен, но без работа, дисциплина и истрајност не е доволно. Низ мојата кариера научив дека не секој ден ќе биде лесен, нема секогаш да победуваш и ќе има моменти кога ќе се сомневаш во себе. Но токму тие моменти те градат.
Сакам децата да не се плашат од грешките и поразите, туку од нив да учат и да продолжат понатаму. Најважно ми е да станат добри луѓе, да имаат самодоверба, карактер и љубов кон спортот.
Ако од тенисот понесат една работа, сакам тоа да биде верувањето во себе – бидејќи вистинскиот победник не е оној што секогаш победува, туку оној што секогаш станува и продолжува“.
🥎После 26 години, што е она што најмногу ве радува кога ќе погледнете што сте создале: полните терени, децата кои тренираат, луѓето кои со години се враќаат или едноставно фактот дека семејната приказна продолжува?
„Најмногу ме радува тоа што по 26 години гледам полни терени, луѓе кои со години ни се враќаат и заедница што расте заедно со „Евросет“. Тоа ми покажува дека не сме создале само спортски центар, туку место со кое луѓето се поврзуваат и во кое се чувствуваат како дома.
Особено ми значи што семејната приказна продолжува. Од една генерација на друга се пренесуваат љубовта кон тенисот, вредностите и желбата за напредок. Денес и нашите деца се веќе дел од „Евросет“, а тоа е особено убаво бидејќи сите три сестри ја продолжуваат оваа приказна заедно. Кога ќе видам некој што првпат доаѓа на терен, а по неколку години станува сигурен, дисциплиниран и самостоен човек, чувствувам дека целиот труд имал смисла.
На крајот, најголемата радост не се само резултатите, туку луѓето и спомените што ги создаваме заедно“.
***Редакцијата на „СпортСпорт“ им се заблагодарува на Ракометната Федерација на Македонија и Кошаркарската Федерација на Македонија, кои ги отворија вратите за проектот „Женски Спортски Приказни“ и без двоумење прифатија да не поддржат во реализација на истиот***
Голема благодарност до нашите партнери: ТРИГЛАВ ОСИГУРУВАЊЕ ЖИВОТ АД СКОПЈЕ.
