Црвена звезда стигна до победа против Интер од Ескалдес, но патот до триумфот не беше едноставен. „Црвено-белите“ мораа да се соочат со одредени тешкотии во текот на натпреварот, а еден од фудбалерите кои ги споделија своите впечатоци по средбата беше Матеј Гаштаров.
Македонскиот репрезентативец истакна дека исклучувањето дополнително ја искомплицирало работата на неговиот тим, но дека тоа не го променило планот за игра. Според неговите зборови, Звезда продолжила да го контролира поседот на топката и да се обидува да го наметне својот ритам, што на крајот ѝ го донело посакуваниот резултат.
„Секако, беше тежок натпревар. Добивме црвен картон, но продолживме да го држиме поседот на топката, да играме онака како што ние сакаме и на крајот стигнавме до победа“, изјави Гаштаров.
Тој се осврна и на атмосферата во соблекувалната по натпреварот. Призна дека средбата била потешка отколку што можеби се очекувало, но повтори дека тимот не отстапил од својата замисла.
Особено ја отфрли можноста дека „црвено-белите“ го потцениле противникот, нагласувајќи дека пристапот е ист без оглед на името на противникот.
„Воопшто не го потценивме противникот. На секој дуел влегуваме како да играме, на пример, против Реал Мадрид. Сигурно не го направивме тоа“, порача младиот фудбалер.
Гаштаров призна и дека немало паника и покрај тоа што резултатот долго време не бил поволен, односно што Звезда бркала негатива од еден гол.
„Не, продолживме со истото темпо и го баравме тој прв гол за да направиме пресврт“, објасни тој.
Тој зборуваше и за својата улога во тимот, со оглед на тоа што во последно време добива шанса на различни позиции, вклучувајќи ги местата стопер и дефанзивен играч за врска. Како што истакна, нема проблем со промените и подготвен е да одговори на секое барање на стручниот штаб.
„Секако, сега играм и како стопер. Не ми пречи на која било позиција да ме постави тренерот, таму ќе играм. Се чувствувам одлично, како и сите играчи на теренот“, заклучи Гаштаров.
