Сериозен скандал го означува финишот на фудбалскиот шампионат во Летонија. Во последното коло од првенството на програмата треба да е дуелот помеѓу сега веќе шампионот РФС и тимот на Рига кој што е второпласиран, и кој што последно го паметиме по двомечот со нашиот Вардар летоска.
Рига во официјално соопштение до јавноста објави дека на овој меч нема да отпатува односно донесена е одлука истиот да не го одигра.
Причина за тоа се според клубот, константните судиски грешки, неправди и малверзации кои што се случувале во текот на шампионатот, па овој потег е еден вид протест против сето тоа.
„Драги навивачи, доверливи пријатели и партнери на нашиот клуб! Фудбалскиот клуб „Рига“ ви се обраќа со длабоко почитување и искрено жалење. Донесовме исклучително тешка, но свесна и принципиелна одлука: нашиот тим нема да оди во финалниот натпревар од шампионатот против РФС“, се вели во соопштението објавено од Рига, а потоа се додава.
„Разбираме колку со нетрпение го очекувавте ова дерби и ни е исклучително жал што ви го ускратуваме ова фудбалско славење. Сепак, моменталната ситуација нè принудува да преземеме овој невиден чекор.“
„Овој натпревар повеќе нема првенствено или спортско значење, но главната причина лежи во длабоката криза на правдата со која се соочивме во текот на целата сезона. Во текот на целата година, сите во летонското фудбалско првенство беа сведоци како систематските и груби судиски грешки директно влијаеја на распределбата на местата на турнирската табела, искривувајќи ги темелите на фер борба.“
„Покрај тоа, редовно беа евидентирани прекршувања на основните етички норми и принципите на фер-плеј , кои треба да бидат основа на секое спортско натпреварување.“
„За жал, се соочивме со целосна рамнодушност и неподготвеност да се справиме со овие проблеми од страна на Летонската фудбалска федерација, и покрај фактот дека и ние и другите клубови од Премиер лигата постојано го привлекувавме вниманието на ЛФФ кон овие факти, и усно и писмено.“
„Нашето молчење или учество во утрешниот натпревар би значело прифаќање на неправдата и легитимирање на процесите што го поткопуваат летонскиот фудбал.“
„Ви изразуваме најдлабоко извинување за фактот што нема да го видите тимот на теренот во недела. Нашиот клуб секогаш игра за вас, и токму за да ја заштитиме честа на клубот, неговата историја и вашата почит, сме принудени да заземеме овој цврст став и да ве замолиме да обрнете внимание на овој проблем и да барате решенија за во иднина!“
