Словачката Петра Влхова стигна до првата победа сезонава во ноќниот слалом кој вечерва се возеше во австриски Флахау.
Петра Влхова докажа дека се враќа во топ форма и победи за првпат оваа сезона и 27-ми пат во кариерата. Со најдоброто време на првата трка и второто во вториот настап, таа ја совлада Микаела Шифрин за 43 стотинки и со тоа ја спречи Американката да ја постигне рекордната 83-та победа на Светскиот куп и да ја престигне сонародничката Линдзи Вон, со која сè уште го дели рекордот кај дамите.
На подиумот заврши и Германката Лена Дуер, која заостана зад Влхова 85 стотинки.
Во поредокот за Големиот кристален глобус, Шифрин е далеку пред сите останати со 1115 поени. Влхова е втора со 796 бодови.
